Clases de apoio para Primaria, Secundaria e preparación de probas ABAU

Ola, son Aida!

Teño ampla experiencia dando apoio escolar na realización de deberes, preparación de exames e organización do traballo nas diferentes materias de Primaria e Secundaria. Intento adaptar sempre as clases ás necesidades, capacidades e ó ritmo das alumnas e alumnos.

En Primaria e 1º da ESO traballo tódalas materias, buscando impulsar o seu traballo mediante a motivación, a proposta de diferentes métodos de estudo e a mellora da autoestima do alumnado.

Nos cursos altos de Secundaria e Bacharelato especialízome nas materias de Lingua Galega, Lengua Castellana e Xeografía e Historia, pero podo apoiar na organización do traballo e o estudo de tódalas materias, axundándoos a organizar e xestionar o tempo.

Na preparación de probas ABAU e 2º de Bacharelato das materias de Historia de España, Historia da Arte , Xeografía e Lingua Galega de Bacharelato, o obxectivo principal, ademais de apoiar no estudo dos contidos, é que os alumnos poidan sacar partido da súa potencialidade e optimizar o traballo nun curso que require de "seleccionar as batallas".
Especialmente importante neste último curso será aprender a analizar o texto ou documento e ser capaces de desenvolver exercicios de comprensión, así como de redacción de comentarios. Ademais, conto con apuntamentos, presentacións e actividades de reforzo para complementar o que traballen na aula.


Son graduada en Historia pola Universidade de Santiago de Compostela. Teño dous másters, un Máster de Investigación en Historia e un Máster de Docencia en Secundaria na Universidade de Santiago de Compostela. Conto con máis de 3 anos de experiencia traballando como profesora.

Teño dispoñibilidade para desprazarme na comarca de Ferrolterra (Narón, Neda, Mugardos, Ares, Fene...) e tamén podo dar clases online.

Pregúntame prezos, horarios e metodoloxía sen compromiso!