Ro Romero

(O prezo que aparece son por clases soltas - se queres iniciar un proceso con clases semanais, falamos para acordar un prezo mensual!)

________________________

Eu tamén era a que quedaba en branco cando tocaba falar en inglés.

A que buscaba mentalmente a palabra, repasaba a frase antes de dicila e, para cando se decidía, xa cambiaran de tema. Así que, se che pasa, enténdote. Eu tamén estiven aí :)

Son Ro, e o inglés pasou de ser algo que estudaba a ser o idioma no que vivín, traballei, fixen amizades e ata discutín ca miña parella. Que tamén é unha boa proba de nivel ;)

Aprendelo desde o español axúdame moito a ensinalo. Coñezo os líos que nos facemos, as cousas que nos custan e eses «pero por que se di así?» que necesitan algo máis ca un «porque si». Ser nativa non te converte automaticamente nunha boa profe: de feito, tendo experiencia en ambas, son mellor profesora de inglés ca de español ou galego, inda que sexan as miñas linguas maternas.

Pero ademais de pasar polo proceso en primeira persoa, tamén teño formación e experiencia:

* Licenciada en Filoloxía Inglesa, co premio extraordinario da miña promoción.
* Un 8,5 sobre 9 no IELTS, exame oficial de inglés.
* 1º de Bacharelato cursado en Bluffton, unha pequena vila da Indiana profunda, en USA.
* Experiencia dando clases en academias e a particulares.
* Profesora de español nunha universidade de Massachusetts, na snowy city of Worcester.
* Monitora de tempo libre en Inglaterra e Irlanda.
* Experiencia de anos como tradutora, correctora e locutora para canles de YouTube en inglés.
* Cinco anos vivindo en Australia, entre canguros, coalas e algún que outro acento difícil de descifrar :)
* E ademáis son moi maja, que sempre suma!

Necesitas apoio co inglés do cole ou do instituto? Entender dunha vez esa gramática que se che atravesa? Preparar un exame ou soltarte falando?
Traballámolo. Adaptarei as clases ao teu nivel, aos teus obxectivos e ao que che estea custando, combinando explicacións e práctica. Con espazo para preguntar o mesmo tres veces se fai falta: ás veces necesitamos que nolo expliquen doutro xeito para que todo encaixe.

Gústame que as clases sexan próximas, que poidas equivocarte con tranquilidade e que entendas o que estás facendo. Que vaias gañando confianza e recursos para seguir pola túa conta, tanto diante dun exame como nunha conversa.

Non me lío máis. Cóntame que precisas e empezamos por aí :)